ايه اللي يخليني اشتري الليكود ده وما اشتريش ده او دليلك لشراء الليكود الجاهز
اولا صناعة الليكود في مصر من الصناعات الوليدة واللي بتخضع لحاجتين لاجتهاد المصنع في ابتكار خلطات جديده او ريسبي جديده تعجب المستهلك.
او القص واللزق يعني اروح كوبي بيست اي ريسبي لكلون مشهر من علي النت(وممكن احط التاتش بتاعي) وهما مغرقين الدنيا.
طيب معايير الليكود الجيد ايه
خلينا متفقين ان الناس مختلفة تماما علي الجلسرين والبروبلين في فريقين فريق بيدافع عن المنتج اللي بيتباع في السوق المصري وفريق بيدافع عن المنتج المستورد وفي نقط كتير كل فريق بيستشهد بيها في وجهة نظره وممكن نبقي نمسكها بالتفصيل في بوست تاني.
بس الاهم واللي الناس كلها اتفقت عليه النيكوتين اللي لازم يكون من مصدر اامن وموثوق منه نظرا لخطورته وخطورة استخدام الانواع الرديئه او المؤكسده او اللي بيتم التعامل معاها بطرق غلط تؤدي لنسب نهائية مش مظبوطة.
تاني حاجة من الحاجات المهمة هي الفلافور وبردو كل الناس اتفقت علي ضرورة خلو الفلافور من مادة داي ايستيل والاهم انها تبقي فلافور ذات اصل مائي وليس زيتي لانها ممكن تسبب اضرار علي المدي القصير والطويل وتكون من شركات معروفة تم التعامل معاها واختبارها.
تالت حاجة و الناس كلها اتفقت عليها ضرورة تعتيق الليكود وانه ياخد الفتره الكافيه علشان يطلع احسن نتيجة متوقعة من عملية التعتيق.
طيب ايه المهم او ادور علي ايه وانا بشتري ليكود
المشكلة هنا في عدة اختلافات بين الاشخاص الليكود كله ناتج لعملية كيمائية وجسم الانسان بتنظمه عدة عمليات كيمائية منها عملية التذوق وهي المهمة هنا بمعني اني انا ممكن ادوق مكون موجود في الليكود من اول مره وانت متحسش انه موجود اساسا وممكن الناتج النهائي لليكود عندي يبقي سي جدا وعند غيري حلو ومفيش زيه وده كمان بيحصل حتي في الليكود البريميم اللي كل الناس اتفقت انه طعمه حلو ومعمول حلو بس سعره مش حلو وده اول اختلاف.
الاختلاف التاني والاهم التانك المستخدم والسلك والقطن والبيلد نفسه بيظهر طعم الليكود ويخليه حلو او يظلمه ويخليه سيء للغاية.
الاختلاف التالت وده مهم بردو ان احيانا ضغط الشغل وطلب السوق بيخلي الحاجة متاخدش وقتها في التعتيق وده بيخلي الباتشات طعمها مختلف عن بعض وده لازم يبقي ليه حل وهو حل صعب شوية بس مش علي المستهلك انما علي المصنع.
طيب نعمل ايه عشان نشتري ليكود حلو ومندفعش فلوس في حاجة تترمي في الارض
اولا اماكن كتير حاليا فيها تست بار ممكن تجرب النوع اللي انت عايز تشتريه قبل ما تشتريه بس بردو هنا هنقع في نقطة اختلاف التانك والبيلد بتاعي لان اغلب التست بار بتخليك تجرب علي دريبر بيظهر الطعم بصورة اوضح من التانك اللي معايا فاللي هو انت تبقي جاهز ببيلد جديد تجرب عليه الليكود وتغيره وتجرب اللي بعده وهكذا وده حل صعب بردو .
الحل التاني ان يبقي في عينات صغيرة خمسه مللي مثلا تباع للتجربة ودي هتبقي اوفر واحسن بس هنا عايزين نلزم المصنع بان كل باتش يبقي ليه رقم وتاريخ وان العينة تبقي من نفس الباتش وتاريخه لعدم اختلاف الباتشات .
الاهم من كده اننا نشتري من ناس موثوق فيها موثوق في امانتها وذمتها ونضافتها ومش اي حد قالك انا بعمل ليكود تقوله اديني اجرب عشان قالك نحارب الغلاء والكلام ده وفي نفس الوقت مش عشان الليكود غالي يبقي حلو ومش عشان رخيص يبقي وحش التجربة خير اثبات.
واخيرا عشان البوست طول اوي اعمل ليكود لنفسك يا اخي جرب مش هتخسر حاجة لو فشلت ابقي اشتري ولا انت هتفضل كده لا بتعرف تعمل كوبايه شاي ولا سندوتش جبنة ولا حتي نص لتر ليكود عيب يعني انت كبرت جرب جرب جرب .

وهنا طرق عمل اليكويد

https://www.youtube.com/watch?v=JMxTvQwX5a0https://www.youtube.com/watch?v=PdNgWZVQYqIhttps://www.youtube.com/watch?v=jvIxi1XLwD0